AfriForum Jeug daag minister om weer leerlingrybewystoets te skryf gegewe hoë druipsyfer
AfriForum Jeug het Barbara Creecy, minister van Vervoer, uitgedaag om weer die leerlingrybewystoets af te lê, aangesien die nuwe gerekenariseerde toetse dit skynbaar onmoontlik gemaak het vir jongmense om ’n leerlinglisensie te bekom. Luidens berigte het die nasionale slaagsyfer vir dié toets met bykans 30% gedaal, terwyl sommige provinsies slaagsyfers van so laag as 17% aangemeld het. AfriForum Jeug meen die minister moet nou haar kennis oor die verkeersreëls op die proef stel om te bewys dat hierdie stelsel wel regverdig is. AfriForum Jeug sal boonop saam met die minister dié toets aflê om insigte te bied oor duisende jongmense se ervaring met die nuwe stelsel.
Hanno Koster, jeugleier van AfriForum Jeug, sê enige inisiatief wat daarop gemik is om korrupsie uit te skakel en die integriteit van hierdie toetsing te verbeter, is ’n welkome verwikkeling. Die stelsel moet egter steeds toesien dat ’n kandidaat se kennis van die verkeersreëls werklik getoets word, eerder as om hul vermoë te toets om ’n ingewikkelde of dubbelsinnige vraag te interpreteer.
Talle jongmense wat AfriForum Jeug oor die kwessie genader het, voer aan dat sommige vrae onduidelik gestel is en dat hulle gevolglik verskeie kere die leerlingrybewystoets moes aflê voordat hulle uiteindelik dit geslaag het.
“Dit is ongetwyfeld in die openbare belang om te verseker dat bestuurders oor deeglike kennis van die verkeersreëls beskik. Die vermeende daling in die slaagsyfers laat egter geldige vrae ontstaan oor of die huidige stelsel sy doelwitte bereik sonder om veelsoortige struikelblokke vir voornemende bestuurders te skep,” sê Koster.
“Dit is daarom belangrik dat die redes vir hierdie skynbare afname duidelik gekommunikeer word, asook die maatreëls wat in plek is om te verseker dat die huidige stelsel billik, deursigtig en toeganklik is.”
AfriForum Jeug het in sy skrywe aan die minister onder meer oor die opdatering en vertaling van die inhoud van die huidige studiemateriaal gevra; of ’n onafhanklike ondersoek na die druipsyfer gedoen is; en of die formulering van sekere vrae moontlik bevoegde kandidate onbillik benadeel.
“Vir baie jongmense is ’n leerlingrybewys die eerste stap wat hulle neem om verdere opleiding te ontvang, werkgeleenthede na te jaag en onafhanklikheid te bekom. Alhoewel ons maatreëls verwelkom wat die integriteit van die stelsel versterk, verdien die publiek ook die versekering dat die stelsel regverdig is, dat die studiemateriaal voldoende is en dat kandidate binne redelike perke op grond van hul kennis van die verkeersreëls beoordeel word,” sluit Koster af.
